Ota-onalik huquqidan mahrum etish asoslari va oqibatlari: nazariya va amaliyot

Zamonaviy dunyo oqimida yangicha tartib-taomillarning shiddat bilan hayotimizga kirib kelayotganligini inobatga olib taʼkidlash joizki, ota-ona va bolalar oʻrtasidagi oilaviy munosabatlarning murakkab vaziyatlari vujudga kelayotganligi ayni haqiqatdir. Shuningdek, oila va bolalarning huquq va manfaatlari borasidagi insoniyatning qarashlari soʻnggi yigirma yil ichida tubdan oʻzgardi. Shu bilan birga, biz oila huquqi deganda huquqlarni himoya qilish usullari – tegishli huquqlarni majburiy amalga oshirish, ularni tiklash va (yoki) tan olish, shuningdek, aybdor shaxsga taʼsir koʻrsatishga qaratilgan soha qonunchiligi bilan tartibga solinadigan va sud tomonidan qoʻllanadigan davlat choralarini tushunamiz. Bu shuni anglatadiki, oilaviy-huquqiy javobgarlik chorasi sifatida ota-ona huquqlaridan mahrum qilish amalda tegishli himoya usuli, muayyan harakatlar tizimini amalga oshirish orqali boshqa shaxsning huquqlarini himoya qilish maqsadida bir shaxsni huquqlaridan mahrum qilish yoki cheklash orqali amalga oshiriladi. Ushbu maqolada ota-onalik huquqlaridan mahrum etish holatlari milliy va xorijiy qonunchilik nuqtayi nazaridan tahlil etiladi. Shuningdek, huquqni qoʻllash amaliyoti, sud materiallari asosida muammolar atroflicha oʻrganilib, milliy qonunchilikni rivojlantirishga doir taklif va tavsiyalar beriladi.