Oliy ta’lim transformatsiyasi Yunеskoning “Oliy ta’limga oid malakalarni tan olish to‘g‘risida”gi global konvensiyasini ratifikatsiya qilish zarurati

Ushbu maqolada YUNЕSKOning “Oliy ta’limga oid malakalarni tan olish to‘g‘risida”gi Global konvensiyasi SWOT-tahlil metodi asosida ilmiy tadqiq qilingan. Mazkur xalqaro konvensiyani O‘zbekiston tomonidan ratifikatsiya qilish zarurati, uning kuchli va zaif jihatlari, imkoniyat va yuzaga kelishi mumkin bo‘lgan tahdidlar haqida mulohazalar ilgari surilgan. Hozirgi kunga qadar ushbu Global konvensiyani ratifikatsiya qilgan davlatlar amaliyoti o‘rganilgan. Oliy ta’limni transformatsiya qilishda mazkur konvensiyaga qo‘shilish asosida erishiladigan natijalar ilmiy-huquqiy prognoz qilingan. Shuningdek, transchegaraviy ta’limni tan olish sohasidagi umumiy yo‘nalish, yondashuv hamda mexanizmlar asosida O‘zbekiston milliy qonunchiligi va amaliyotini isloh qilish masalalari ko‘rib chiqilgan. Jismoniy shaxslarning oliy ta’limga oid malakalarining adolatli va shaffof tarzda, hech qanday kamsitishlarsiz tan olinish huquqi dunyoning barcha mamlakatlarida so‘zsiz kafolatlanishi zarurligi qayd etilgan. Shundan kelib chiqib, O‘zbekistonning ushbu konvensiyaga qo‘shilishi, zarur tashkiliyhuquqiy va institutsional mexanizmlarni shakllantirish masalalari ilmiy tahlil qilingan. Tadqiqot yakunida ayrim kelib chiqishi mumkin bo‘lgan xavflar, xatarlarga qaramasdan, O‘zbekiston tomonidan Global konvensiya tezroq ratifikatsiya qilinishi zarur, degan xulosaga kelingan. Mahalliy oliygohlarning dunyoning yetakchi universitetlari bilan integratsiyasi kuchayishi, xalqaro reytinglardagi o‘rni oshishi, ta’lim xizmatlarining tashqi bozorga chiqishi va eng muhimi, insonlarning oliy ta’lim olish huquqini ta’minlash uchun ushbu konvensiyaning ratifikatsiya qilinishi zarurligi ilmiy asoslangan.