Bezorilik: jinoiy-huquqiy kvalifikatsion muammolar

Ushbu maqolada bugungi kunda bezorilik jinoyatlari boʻyicha surishtiruv va dastlabki tergov oʻtkazishda uchrayotgan kvalifikatsion muammolar, isbotlash jarayonining oʻziga xos jihatlari va mazkur masalalarni huquqiy tartibga solish jihatlari, jabrlanuvchi shaxsi, uning huquqlari va mavzuga doir boshqa masalalar tadqiq etilgan. Shuningdek, maqolada bezorilik jinoyatlarini mayda bezorilik huquqbuzarligidan farqlovchi kvalifikatsion chegarasi, bezorilik hamda mayda bezorilikning dispozitsion sharhi yoritib berilgan. Bundan tashqari, maqolada bezorilik jinoyati va mayda bezorilik huquqbuzarligi dispozitsiyasida keltirilgan noaniq jumlalarni bugungi kundagi disreksion talqin etilish holatlari amaliy misollar bilan yoritilgan. Shu bilan birga, bezorilik jinoyati boʻyicha “Jamoat joyi” tushunchasining qonunlarda yakdil sharhi berilmaganligi tanqid qilinib, ushbu jumlaga huquqiy taʼrif ishlab chiqilgan. Bunda jamoat joyi tasnifi ham keltirilib, qonunchilikda jamoat joyi hisoblanmagan joylarning qatʼiy roʻyxati berilishi lozimligi isbotlangan. Tadqiqotda analiz, sintez, induksiya, deduksiya, qiyosiy-huquqiy tahlil kabi metodlar qoʻllangan. Tadqiqot ishida ilgʻor xorijiy tajriba, ilmiy-nazariy qarashlar va tergov hamda sud amaliyoti oʻrganilgan, buning natijasi oʻlaroq Oʻzbekiston Respublikasi Jinoyat kodeksiga va boshqa qonun hamda qonunosti hujjatlarga tegishli oʻzgartirish va qoʻshimchalar kiritish boʻyicha taklif va tavsiyalar ishlab chiqilgan.