Dunyoviy dаvlаt vа din o‘rtаsidаgi munosаbаtlаrning konstitutsiyaviy-huquqiy аsoslаri xorij vа O‘zbekiston tаjribаsi

Maqolada davlat va din munosabatlarining mazmun-mohiyati Аmerika Qo‘shma Shtatlari, Germaniya Federativ Respublikasi, Polsha Respublikasi, Fransiya Respublikasi, Turkiya Respublikasi, Yaponiya, Estoniya Respublikasi, Chexiya Respublikasi va O‘zbekiston Respublikasi konstitutsiyalariga muvofiq tahlil qilinadi; vijdon erkinligining konstitutsiyaviy-huquqiy asoslari, ular uchun xos bo‘lgan umumiylik, o‘xshashlik va o‘ziga xosliklar dunyoviylik, ilmiylik va qiyoslash usullaridan foydalangan holda o‘rganilgan, tegishli xulosalar chiqarilgan, kelgusida amalga oshirilishi lozim bo‘lgan ilmiy-tadqiqot ishlari yo‘nalishlari haqida taklif-tavsiyalar bildirilgan. Hozirgi davrda ijtimoiy-siyosiy, maʼnaviy-mafkuraviy sohalarda diniy omilning taʼsiri kuchayib borayotgani, mamlakatimizda konstitutsiyaviy islohotlar o‘tkazishga qizg‘in tayyorgarlik ko‘rilayotganini inobatga olib, muallif ilmiy jamoatchilikning alohida diqqat-eʼtibori quyidagilarga qaratilishini dolzarb deb hisoblaydi: davlat va din o‘rtasidagi munosabatlarga oid xalqaro va mintaqaviy hujjatlarni chuqur va atroflicha ilmiy tahlil qilish; davlat va din o‘rtasidagi munosabatlarni tartibga soluvchi normalar genezisi va evolyutsiyasiga bag‘ishlangan keng qamrovli ilmiy tadqiqot ishlarini amalga oshirish; hozirgi davrda amalda bo‘lgan davlat va din o‘rtasidagi munosabatlarni tartibga soluvchi xorijiy, shu jumladan, dunyoviy davlatlar qonunchiligini qiyosiy o‘rganish, bu borada erishilgan yutuqlardan milliy qonunchilikni takomillashtirishda tanqidiy foydalanish bo‘yicha taklif va tavsiyalar berish. Shuningdek, dindan siyosiy maqsadlarda foydalanishga harakat qilayotgan ijtimoiy-siyosiy kuchlarning faollashuvi, ularning dindan, ayniqsa, islomdan niqob sifatida foydalanayotgani, mintaqalar va xalqaro xavfsizlikka jiddiy tahdid solayotganini inobatga olgan holda, “Diniy niqob ostidagi terrorchilikka qarshi kurash” to‘g‘risidagi konvensiya loyihasini ishlab chiqish va Birlashgan Millatlar Tashkiloti Bosh Аssambleyasi tomonidan qabul qilinishi davr talabidir.